Францын боловсролын сайд эсэргүүцэл дахин эхлэхтэй холбоотойгоор аюулгүй байдлын үүднээс сургууль хаах шийдвэр гаргаснаа мэдэгдэв.

Францад улам бүр хүчирхийллийн шинжтэй болж буй оюутнуудын эсэргүүцлийн үеэр 500 орчим сургуулийг бүрэн болон хэсэгчлэн хаахаар төлөвлөжээ.

Боловсролын сайд Эдуар Жеффрэ “хичээлийг хэсэгчлэн, үе шаттайгаар хэвийн явуулах” зорилгын хүрээнд урьдчилан сэргийлэх арга хэмжээ авч буйгаа мэдэгдсэн байна. Гэвч амралтын өдрүүдэд түр намжсан оюутнуудын эсэргүүцлийг зохион байгуулагчид өнгөрсөн сард эхэлсэн жагсаал, цуглааныг долоо хоногийн эхээр дахин үргэлжлүүлэхээр төлөвлөж байгаагаа мэдэгджээ. Тэд анги дүүргэлт их, багшийн хүрэлцээ муу зэрэг олон асуудлыг эсэргүүцэн жагсаж байгаа юм.

“Аюулгүй байдлын нөхцөл хангагдаагүй” тул 400-500 ахлах сургуульд хичээлийг “бүрэн буюу хэсэгчлэн зогсооно” гэж сайд мэдэгдэв. Эсэргүүцэл эхэлснээс хойш 24 сургууль шатаагдаж, сүйтгэгдсэн байна.

Жеффрэ сургуулиудыг хааж буй нь аюулгүй байдлыг хангах урьдчилан сэргийлэх арга хэмжээ хэмээн тайлбарлав. Эсэргүүцлийн зохион байгуулагчид Ерөнхийлөгч Эммануэль Макроны засгийн газрыг “бодитой арга хэмжээ” аваагүй хэмээн үзэж, мягмар гарагт өргөн хүрээтэй жагсаал, цуглааныг дахин зохион байгуулахыг уриалжээ.

Жеффрэгийн мэдээлснээр, есдүгээр сарын дундуур Парисын бүс нутагт оюутнуудын эсэргүүцэл анх эхэлснээс хойш 170 орчим оюутан, боловсролын салбарын 78 ажилтан гэмтэж бэртжээ.

Үндэсний боловсролын яамны мэдээлснээр, баасан гарагт Францын 3700 ахлах сургуулийн дор хаяж 400 нь хаагдсан бол 560 сургууль эсэргүүцлийн жагсаал болон үйл ажиллагааны сааталд өртсөн байна.

Дотоод хэргийн сайдын мэдээлснээр, өнгөрсөн долоо хоногт 5000 гаруй хүнийг баривчилсны 85 хувь нь насанд хүрээгүй хүүүхдүүд байжээ.

Эсэргүүцлийн жагсаалын үеэр цагдаа нарын хэрэглэсэн хүчийг “хэтрүүлсэн” гэж шүүмжлэгчид үзэж байна. Amnesty International хүний эрхийн байгууллага оюутнуудын эсэргүүцлийг “хэлмэгдүүлэх бус, сонсох ёстой асуудал” гэж мэдэгджээ.