Өвлийн олимпын тоглолт эхлэхээс  хоёр долоо хоног хүрэхгүй хугацааны  өмнө Бээжингийн эрх баригчид хоёр сая хүнээс коронавирусийн шинжилгээ авсан тухай Associated Press агентлаг мэдээлэв. Нэгдүгээр сарын 15-наас хойш нийслэлд бүртгэгдсэн 40 тохиолдлын ихэнх нь Фэнтэй дүүргээс илэрсэн тул хамгийн түрүүнд уг дүүргийн оршин суугчдыг шинжилгээнд хамруулжээ. Мөн Бээжингийн эрх баригчид сүүлийн хоёр долоо хоногт халууны болон ханиадны эм худалдан авсан бүх хүнийг шинжилгээнд хамруулахаа зарласан байна. "Өвчний тархалтаас урьдчилан сэргийлэх нь өмнөхийн адил  ээдрээтэй хэвээр байна. Иймээс хотын захиргааны бүх албад хурдан шуурхай, идэвхтэй ажиллах ёстой”  гэж Бээжингийн захиргааны төлөөлөгч Сюй Хэзянь хэлжээ. Даваа гарагийн байдлаар олимпт хүрэлцэн ирсэн зочдын тоо 3000 давж, ирсэн хүмүүс өдөр бүр шинжилгээ өгч байна. Өнөөдрийн байдлаар зочдын дундаас 78 хүн коронавирусийн халдвартай нь тогтоогдоод буй.