Монголын Үйлдвэрчний эвлэлийн холбоо, Монголын ахмадын холбооноос тэтгэвэр тэтгэмжийн нэмэгдлийн талаар мэдээлэл хийлээ.

Монголын Ахмадын холбооны ерөнхийлөгч Ц.Сүхбаатар "Бид тэтгэврийн доод хэмжээг нэмэгдүүлж, тэтгэврийн зөрүүг багасгахыг шаардаад байна. Сүүлийн хоёр жил тэтгэвэр тэтгэмж нэмэгдээгүй. Энэ жилээс бензин шатахуун, өргөн хэрэглээний бараа бүтээгдэхүүний үнэ нэмэгдсэн. Тэтгэвэр тэтгэмж энэ бүхэнд хүрэлцэхгүй байна. Засгийн газар энэ асуудлыг анхаарах хэрэгтэй. Бидний зүгээс 2022-2023 онд тэтгэврийн зөрүүг арилгаж үе шаттай нэмэгдүүлж өгөхийг шаардаж байна. Өнөөдөр 500-600 мянган төгрөгийн тэтгэвэр авах ёстой хүн 350 мянган төгрөг авч байна. Төрд 30-40 жил ажилласан багш, үйлчлэгч, тогооч зэрэг хүмүүс 350 мянган төгрөгийн тэтгэвэр авч байна. Тэтгэврийн зөрүүг анхаарах шаардлагатай байна" гэлээ. 

Монголын Үйлдвэрчний эвлэлийхолбооны ерөнхийлөгч С.Эрдэнэбат "Өнөөдөр нийт ахмадуудын 80 хувь нь 350 мянган төгрөгийн тэтгэвэр авч байна. Ахмадууд тэтгэвэр тэтгэмжээ нэмэгдүүлэх санал хүсэлтийг манай холбоонд олон жил дараалан хүсэлт тавьж байгаа. Өнөөдөр өргөн хэрэглээний 21 нэр төрлийн бараа бүтээгдэхүүний үнэ нэмэгдэж байна. Бид засгийн газарт тэтгэвэр тэтгэмж, цалин хөлсийг нэмэгдүүлэх шаардлага хүргүүлж буй. Бүх ахмадуудын тэтгэвэр тэтгэмжийг 10 хувиар нэмэгдүүлэх хэрэгтэй. Тэтгэврийн доод хэмжээг 500 мянган төгрөгөөр нэмэгдүүлж тэдний хөдөлмөрийг шударгаар үнэлэх хэрэгтэй. Бидний зүгээс ирэх сараас эхлэн тэтгэвэр тэтгэмжийг үе шаттай  нэмэгдүүлэхийг шаардаж байна" гэлээ.