Монгол Улсад сүүлийн жилүүдэд боловсруулах үйлдвэрийн төслүүд жилийн жилд яригдсаар цаасан дээр л үлддэг жишигтэй.  Сүүлийнүед урагшилж байгаа боловсруулах үйлдвэрийн гурван төсөл байгаа юм.  Тухайлбал,  Газрын тос боловсруулах, Зэс боловсруулах, Алт цэвэршүүлэх үйлдвэр юм. Үүнээс Газрын тос боловсруулах үйлдвэр хамгийн урагштай байгаа бол Зэс боловсруулах үйлдвэрийн хөрөнгө оруулагч тодорч, Алт цэвэршүүлэх үйлдвэр гарааны зурхайд ирээд байсан юм. Харин энэ гурван үйлдвэрийн төсөлд Монгол Улс гурван улстай хамтрахаар болсон.

Газрын тос боловсруулах үйлдвэр- Энэтхэг

Газрын тос боловсруулах үйлдвэрийн төсөлд Монгол Улс Энэтхэг улстай хамтарч байгаа. Энэ хүрээнд Бүгд найрамдах Энэтхэг улсын Засгийн газар тэрбум ам.долларын зээл олгосон. Мөн нэмж олгох 236 сая ам.долларын хөнгөлөлттэй зээлийн гэрээнд аравдугаар сард гарын үсэг зурсан юм. Олон Засгийн газар дамжин яригдаж, 30 жилийн нүүрийг үзсэн Газрын тос боловсруулах үйлдвэрийн ажил өдгөө бодит ажил болж эхэлж, Сайншандаас 27 км төмөр зам тавьж өнгөрсөн наймдугаар сард ашиглалтад оруулсан. 2023 онд газрын тос боловсруулж эхэлнэ. Ингэхдээ жилд 1.5 сая тонн газрын тос боловсруулна. Дотооддоо ийнхүү боловсруулах үйлдвэртэй болсноор литр авто бензин ойролцоогоор 900 төгрөгийн үнэтэй гарах тухай тооцоо бий.

Зэсийн баяжмал боловсруулах үйлдвэр -Япон

Дараагийн үйлдвэрийн төсөл бол Зэсийн баяжмал боловсруулах үйлдвэрийнх юм. Монгол Улс  Өмнөговь аймгийн Ханбогд сумын нутагт Зэсийн баяжмал боловсруулах үйлдвэр байгуулахаар болсон. Энэ дагуу дэлхийн 30 гаруй  томоохон зэс үйлдвэрлэгчид зэс хайлуулах төсөлд оролцох хүсэлтээ ирүүлэх тухай албан бичиг илгээсэн талаар салбарын сайд дурдаж байв. Тэгвэл Монгол Улс зэсийн салбарт Япон улстай хамтрахаар болсон.  Монгол улсын Засгийн газрын 88 дугаар тогтоолд зааснаар Засгийн газар төслийн хөрөнгө оруулалтын 10 хүртэлх хувийг үнэ төлбөргүй эзэмших бөгөөд ямар нэгэн баталгаа гаргахгүй. Харин хөрөнгө оруулагчид 90 хувийг эзэмшиж, төслийн хөрөнгө оруулалтыг 100 хувь хариуцах тухай дурдсан байгаа. Энэ үйлдвэр жилд сая тонн баяжмал боловсруулах хүчин чадалтай байх бөгөөд 2020 он гэхэд ашиглалтад оруулахаар төлөвлөсөн нь сураг алдраад байна.

Алт цэвэршүүлэх үйлдвэр- Казахстан

Одоогийн Ерөнхийлөгч У.Хүрэлсүх Ерөнхий сайд байхдаа Казахстан улсад айлчилж, Монгол Улсад алт цэвэршүүлэх үйлдвэр барих, ашиглалтад оруулах гэрээнд гарын үсэг зурсан. Үүний дараа Алт цэвэршүүлэх үйлдвэрийн ТЭЗҮ-ийг Уул уурхай, хүнд үйлдвэрийн яамны Эрдэс баялагийн мэргэжлийн зөвлөлийн Боловсруулах үйлдвэрийн салбар зөвлөлөөр хэлэлцүүлэн батлуулсан байдаг.

Үйлдвэр ашиглалтад орсноор Монгол Улсын газрын хэвлий доорх  алт, мөнгө, үнэт металлыг өөрсдөө боловсруулж, дэлхийн стандартад нийцсэн алтан болон мөнгөн гулдмай, бэлэг дурсгалын гулдмай, үрэл, ялтас зэрэг цэвэршүүлсэн бүтээгдэхүүн дотооддоо үйлдвэрлэж эхлэх талаар “Эрдэнэс алт ресурс” ХХК-аас мэдээлж байв. Үйлдвэрийг барьж байгуулахад 81.9 сая ам.доллар шаардлагатай хэмээн ТЭЗҮ-д тусгаад байгаа бол 2020 онд ашиглалтад оруулахаар мөн л төлөвлөөд байсан юм.