Боловсролын зээлийн сангаас 2021-2022 оны хичээлийн жилд оюутан хөгжлийн зээлийг хэрхэн олгох талаар мэдээлэл хийлээ. Оюутны хөгжлийн зээл өмнө нь 1993-2015 оныг хүртэл "Хөнгөлөлттэй зээл" нэртэйгээр олгогддог байсан. Өөрөөр хэлбэл, дотоодын их, дээд сургуульд сурах оюутнууд дипломоо барьцаанд тавиад суралцдаг байсан. Харин гадаадын их, дээд сургуульд суралцах иргэд байраа барьцаанд тавьсан. Улмаар мөн хугацаанд Боловсролын зээлийн сангаас нийт 40 гаруй тэрбум төгрөгийн хөнгөлөлттэй зээл олгосон. Одоогоор 13 мянга 650 ширхэг диплом манай дээр байна. Эдгээр дипломыг авахыг шаардаж маш олон удаа албан бичиг хүргүүлсэн. Дараагийн асуудал бол 2021-2022 оны хичээлийн жил оюутан хөгжлийн зээл олгох эсэх юм. Оюутан хөгжлийн зээлийг олгоно. Тодруулбал, 2,3,4 дүгээр курст суралцаж байгаа, өмнө нь зээл авч байсан оюутнуудад үргэлжлүүлэн олгох юм. Мөн Засгийн газрын 71 дүгээр тогтоолын дагуу өнчин, цаатан өрхийн, багш, сувилагч мэргэжлээр суралцаж буй оюутнуудад олгодог буцалтгүй тусламжийг олгохоор болсон. Боловсролын зээлийн сан нь Ерөнхийлөгчийн тэтгэлэг болж өөрчлөгдөж байгаа. Ерөнхийлөгчийн нэрэмжит тэтгэлэг 2022-2023 оны хичээлийн жилээс эхлэн жил бүр хэрэгжинэ.  Монгол улсын 21 аймгийн 330 сум, Улаанбаатар хотын 9 дүүргийн 171 хорооноос нийт 504 хүүхдийг сонгон шалгаруулж “Дэлхийн шилдэг их, дээд сургууль” болон “Гадаадын их, дээд сургууль”-д суралцах боломж олгоно. 2021-2022 оны хичээлийн жилд Оюутны Хөгжлийн Зээлийг шинээр олгохдоо зөвхөн Монгол улсад шаардлагатай тэргүүлэх 35 чиглэлийн мэргэжлээр суралцагсдад олгоно.