Оюутолгой төслийг Монгол Улсын Засгийн газартай хамтран хэрэгжүүлэгч “Туркойз хилл ресурс” компанийн хяналтын багцыг эзэмшдэг “Rio Tinto”  зүгээс Монгол Улсын Засгийн газарт тодорхой санал тавьсан талаар өнөөдөр Ажлын хэсгийн ахлагч, ХЗДХ-ын сайд Х.Нямбаатар мэдээлэл хийлээ.  Түүний хийсэн мэдээллийг сийрүүлэн хүргэе.

“Рио Тинто” компани саналаа өнгөрсөн долоо хоногт Засгийн газарт хүргүүлсэн бөгөөд түүнд дараах асуудлууд багтсан байна. Үүнд:  

-Оюутолгойн гүний уурхайн бүтээн байгуулалт хойшилсонд хүлцэл өчжээ.

-Гүний уурхайн зардлын Монголын талд ногдох хэсгийн хүүг бууруулах санал тавьсан.

-2.45 тэрбум ам.долларын өр бичигдсэн. Энэ өрийг бууруулах асуудлаар хэлэлцээр хийхэд бэлэн байгаагаа илэрхийлсэн байна.  /Зардал хэтрэээгүй байх үед буюу анх манай талд ногдох зээл 1.4 тэрбум ам.доллар байсан/

-“Эрдэнэс Оюутолгой”-н эзэмшиж байгаа 34 хувиа хэрхэхээ ярилцах боломжтой гэдгээ илэрхийлжээ /Дотоодод яригдаж байгаа 34 хувиасаа татгалзах хувилбарыг хэлж байна/

-Ирэх гурван жилд 350 сая ам.долларыг нэмэлтээр улсын төсөвт төвлөрүүлэхэд бэлэн гэсэн байна.  

-Лондоны Арбитрын шүүхэд гаргасан сөрөг нэхэмжлэлээ түр хойш тавиач гэж хүсжээ.

Дээрх саналуудыг Ажлын хэсэг өнгөрсөн долоо хоногт хэлэлцээд сая Засгийн газарт танилцуулсан байна.  “Рио Тинто”-гоос Б.Болд тэргүүтэй төлөөлөгчид ирсэн бөгөөд дээрх асуудлуудаар хэлэлцээр хийнэ гэсэн мэдээллийг Х.Нямбаатар өглөө. “Бид энэ удаа 2009 оны алдаагаа давтаж болохгүй, маш няхуур ажиллах шаардлагатай“ гэж тэрээр онцлон тэмдэглэсэн юм. Захидалд далд уурхайн бүтээн байгуулалтын асуудлаас гадна 2009 оны Хөрөөнгө оруулалтын гэрээнд орсон зарим заалтын хэрэгжилтийн асуудлыг мөн тусгасан байсныг Х.Нямбаатар онцолсон. Тухайлбал,  төслийн цахилгаан эрчим хүчний тогтвортой эх үүсвэрийг бий болгох асуудлыг ярья гэсэн байна. 2009 оны гэрээнд Оюутолгойг дотоодын эх үүсвэрээс хангах заалт орсон ч өнөөдрийг хүртэл хэрэгжих боломжгүй явж ирсэн юм. Засгийн газар маргааныг цаашид үргэлжлүүлэх байр суурьтай байгаа. 1 их наяд бол гүний уурхайн ашиглалтад орох хугацаа хойшилсон нь Монгол Улсад хүндрэл учруулсан гэж үзээд төсөвт дэмжлэг үзүүлэх зорилгоор ногдол ашгийг урьдчилж төлж байгаа юм байна гэсэн ойлголттой байгаа. Мөн Засгийн газрын хэрэг эрхлэх газрын дэд дарга Б.Солонгоо “Манай талд ногдох зардал 1.4 тэрбум ам.доллар байснаа 2.45 тэрбум ам.доллар болж нэмэгдсэн. Энэ нь хүүтэй бөгөөд олон жилийн дунджаар жилийн 8 орчим хувь байдаг. Үүн дээр нэмээд хүүгийн хүү тооцох аргачлалаас болж хүндрэлүүд гарч болзошгүй. Гэхдээ Засгийн газрын түвшинд 34 хувиа зарах асуудал одоогоор яригдаагүй байна” гэлээ.