Багануур дүүрэгт сүүлийн өдрүүдэд коронавирусын халдварын тархалт ихссэж, нас баралт бүртгэгдссэнтэй холбоотойгоор ЭМТ-ийн дарга Д.Шинэбаяраас тодруулга авлаа.

• Танд энэ өдрийн мэнд хүргэе. Дүүргийн хэмжээнд коронавирусын тархалтын өнөөгийн нөхцөл байдлын талаар мэдээлэл өгнө үү?
• Сүүлийн 24 цагт шинээр 24 тохиолдол батлагдсанаар нийт өвчлөл 330 болсон. Яг одоо эмнэлэгт хэвтэн эмчлүүлж буй хүн 128. Гэрийн тусгаарлалт, хяналтанд байгаа ойрын хавьтал 459. Гэрээр эмчлэгдэж буй 8. Дүүргийн хэмжээнд ковид19 шалтгаант нас баралт 2. Зургаадугаар сарын 12-нд нэг, 13-нд нэг хүн нас барсан. Нас барсан хоёр тохиолдлын хувьд хавсарсан архаг суурь өвчтэй, нэг нь хэвтэрийн өвчтөн байсан.
• Голомт тодорхойлох, тархалтын гинжин хэлхээг илрүүүлэхэд тохиолдож буй саад бэрхшээл юу байна вэ? Эх сурвалж тодорхойгүй тохиолдол хэр байна?
• Одоо бол голомт тодорхойлох гэхээсээ илүү Улаанбаатар хот руу зорчоод ирсэн иргэд маань хариуцлагатай байх хэрэгтэй. Улаанбаатар хот руу яваад ирсэн иргэдээс коронавирусын халдвар ихэвчлэн илэрч байна. Халдвар 3-5 хоногт илэрч байгаа бөгөөд энэ хооронд гэр бүлийнхэн, ойр тойрныхондоо халдвар тараах нь элбэг байна. Улаанбаатар хот руу яваад ирсэн бол өөрийгөө гэртээ долоо хоног тусгаарлах журам хүчингүй болсон. Тэгсэн хэдий ч иргэд та бүхэн маань хайртай дотны хүмүүсээ хамгаалж Улаанбаатар хот руу зорчоод ирсэн бол аль болох өөрийгөө тусгаарлаачээ гэж хүсье.
• Нас баралт бүртгэгдсэнтэй холбоотой айдас түгшүүр их байна. Эмчилгээний чанар ХӨСҮТ-тэй ижил хэмжээнд байж чадаж байна уу?
• Коронавирусын халдварын үед хүнд, хөнгөн, маш хүнд хүмүүсийг хэрхэн эмчлэх дүрэм журам, стандарт гарсан. Энэхүү стандартын дагуу эмчилгээ үйлчилгээг хийж байна. Манай эмнэлгийн хувьд амьсгалын таван ширхэг аппараттай. Дутагдсан эм тариа, тоног төхөөрөмж байхгүй. Эрүүл мэндийн яамнаас батлагдсан эмнэл зүйн зөвлөх багууд гэж байгаа. Бид хүнд болон хүндэвтэр хүмүүсийн эмчилгээнд тухай бүр дээрх зөвлөх багуудаас зөвлөгөө авч байна. Ийм учраас эмчилгээний чанарт ялгаа байхгүй.  
• Дүүргийн хэмжээнд вакцинжуулалт хэдэн хувьтай байгаа вэ? 2 дахь тундаа хамрагдаад коронавирусын халдвараар өвчилсөн тохиолдол дүүргийн хэмжээнд хэд байгаа вэ?
• Дүүргийн хэмжээнд нэгдүгээр тунд 15654 хүн, хоёрдугаар тундаа хамрагдсан 14030 хүн байна. Энэ нь хамрагдвал зохих хүн амын 91 хувь. Өнөөдрөөс эхлэн жирэмсэн эмэгтэйчүүд болон 16-17 насны хүүхдүүдийг сайн дурын үндсэн дээр эцэг эхийн зөвшөөрөлтэйгээр вакцинд хамруулахаар бэлтгэл ажлыг ханган, вакцины татан авалтаа хийсэн. Дүүргийн хэмжээнд халдвар авсан нийт хүмүүсийн 30 хувь нь хүүхэд. 25,3 хувь нь коронавирусын эсрэг дархлаажуулалтын хоёр дахь тундаа хамрагдаад 14 хоносон иргэд байгаа юм. Дашрамд хэлэхэд коронавирусын эсрэг дархлаажуулалтын цэг дүүргийн ЭМТ-ийн баруун талд байрлах Нийгмийн эрүүл мэндийн төвд 9-17 цагийн хооронд ажиллаж байна.
• Дүүрэгт хөл хорио тогтоож магадгүй нь гэсэн яриа сүүлийн үед их гарч байна. Эрүүл мэндийн байгууллагын зүгээсс ДОК-д энэ талаар санал оруулсан уу?
• Хот хоорондын хөдөлгөөн нээсэн тавдугаар сарын 22-оос Багануур дүүргийн халдварын тоо нэмэгдэж буйтай холбоотойгоор ДОК руу олон нийтийг хамарсан арга хэмжээ зохион байгуулахгүй байх, нэг дор 10-с дээш хүн цуглуулахгүй байх гэсэн хүсэлтүүд өгсөн. Хот хоорондын хөдөлгөөний зохицуулалтыг хийж өгөхийг хүссэн. Багануур нийслэлийн нэг дүүрэг учир ДОК шууд хөдөлгөөнийг хязгаарлах эрх байхгүй, Нийслэлийн онцгой комисст хандаж, УОК-с гаргасан шийдвэрийг дагана гэсэн байр суурьтай байна. Дүүргийн ЭМТ-ийн зүгээс баяр наадмыг хойшлуулах хүсэлтэй байгаа.
• Эрүүл мэндийн байгууллагын хүний нөөц, эдийн засгийн боломж хэр байгаа вэ? Халдвар буурахгүй бол цаашид хэдий болтол ажиллах нөөц бололцоо байна вэ?
• Эмч эмнэлгийн ажилчид улаан бүс рүү орж 14 хоног ажиллаад, халдварын бүс рүү орж ажилласан учир гэр бүлийнхэндээ халдвар тараах эрсдэлээс урьдчилан сэргийлж долоо хоног тусгаарлаад шинжилгээ өгч хариу сөрөг гарсан тохиолдолд гэртээ харьж байгаа. Эрүүл мэндийн байгууллагын хүний нөөц одоо хүндэрч эхэлж байна. Дүүргийн хэмжээнд байгаа сургууль, цэцэрлэгийн болон эмч нарын судалгааг гаргаж тохирох ажлын байранд нь дагалдуулах ажлыг зохион байгуулж эхэлсэн.
• Дүүргийн ЭМТ коронавирусын эмчилгээний хэдэн ортой ажиллаж байна? Нөөц байгаа юу?
• Манай эмнэлэг нийт 130 хүнийг хэвтэн эмчлүүлэх нөөцтэй. Одоо 128 хүн хэвтэн эмчлүүлж байна. Цаашид халдварын тохиолдол нэмэгдвэл хөнгөн, шинж тэмдэггүй байгаа өвчтөнүүд болон өөрийн хүсэлтээр гэртээ эмчилгээ хийлгэхийг хүссэн хүмүүсийг гэрээр эмчилнэ. Өнөөдрийн байдлаар найман хүн гэрээр эмчлүүлж байгаа бөгөөд ӨЭМТ-үүд нь хяналт тавьж байгаа. Мөн тухайн өвчтөнд ямар нэгэн шинж тэмдэг илэрч, хүндрэл гарвал хэвтэн эмчлүүлэх боломж нь нээлттэй.  
• Цаашид шинжилгээг төлбөртэй авна гэсэн мэдээлэл байгаа. Манай дүүрэгт ч мөн адил үйлчлэх үү?
• Яг одоогоор /2021-06-14-ний 11 цаг 30 минут/ шинжилгээг төлбөртэй болгох талаар ямар нэгэн тушаал шийдвэр ирээгүй байна. Сайн дурын шинжилгээг түргэвчилсэн оношлуураар 241-р цэцэрлэгийн байранд авч байгаа бол ойрын хавьтал, гэрийн тусгаарлалтад байгаа иргэдээс PCR шинжилгээг авч байна.
• Дүүргийн ЭМТ-ийн дотор, мэдрэлийн тасагт коронавирус голомтлон гарсан гэсэн ам дамжсан яриа байна. Энэ үнэн үү?
• ЭМТ-ийн дотрын тасгийн нэг өрөөнд эмчлэгдэж байсан гурван хүн, төрөх тасгаас нэг хүний хариу эерэг гарч баталгаажсан. Эмнэлэгт хэвтэх үед нь түргэвчилсэн оношлуураар шинжилгээ авахад сөрөг байсан ч эмчлүүлж байх үед нь давтан шинжилгээгээр эерэг гарсан. Өвчний нууц үедээ эмнэлэгт хэвтэн эмчилгээний явцад онош батлагдах тохиолдол сүүлийн үед нэмэгдэж байна. Вакцины хоёр тундаа хамрагдаад 14 хоночихсон тохиолдолд эрүүл мэндийн байгууллага ямар нэгэн шинжилгээний хариу шаардахгүйгээр хэвтүүлэн эмчлэх журамтай. Дотрын тасагт гарсан өвчлөлтэй холбоотойгоор халдвар авсан эмч эмнэлгийн ажилтан байхгүй. Харин улаан бүсэд ажиллаж байгаа эмч эмнэлгийн ажилчдаас халдвар авах тохиолдол нэмэгдэж байна. Эмч эмнэлгийн ажилчдаас үүдсэн халдварын тохиолдол байхгүй.
• Иргэддээ анхааруулж хэлэх зүйлүүд?
• Халдварын тохиолдол ихсэх тусам иргэд өөрийн ойрын хавьтлуудаа нуух, хэлэхгүй байх тохиолдол байсаар байна. Жирэмсэн эмэгтэйчүүд болон хүүхдүүд, архаг суурь өвчтэй хүмүүс вакцинд хамрагдаагүй байгаа. Хавьтлуудаа хэлснээр дээр дурдсан бүлгийн иргэдээ эрсдэлээс урьдчилан сэргийлэх боломжийг нэмэгдүүлнэ. Мөн олон нийтийн газраар хүүхдүүдээ битгий явуулаачээ, Улаанбаатар хот руу хүүхдүүдээ дагуулж битгий яваарай, гадаа бөөнөөр нь тоглуулахаас альболох татгалзахыг уриалж байна.