Багануур дүүргийн тавдугаар хороо Жижиг дунд үйлдвэрлэлийг дэмжих төвөөс гуравдугаар хорооны Шунхлай ШТС хүртэлх 1,2 км хатуу хучилттай замыг барьж, улсын комисс хүлээн авч хөдөлгөөнийг нь нээгээд өнөөдөр /2020.09.01/ яг 6 хонож байна. Дүүргийн төв замын ачааллыг бууруулах зорилготой энэ замын хөдөлгөөнийг нээгээд дөнгөж 4 хоноод л эвдрэл гэмтэл гарсан, хагарсан цуурсан гэсэн “хэл ам” сошиалд тарж эхлэв. Тарж эхлэхээр барахгүй угаасаа хагараад цуураад эхэлчихсэн байна. Нийслэлийн хөрөнгө оруулалтаар 2019-2020 онд дээрх авто замын барилгын ажлыг хоёр багц тендер болгон зарласан бөгөөд багц-1 нь МТ ШТС-аас эхлэн 500 метр юм.

Гүйцэтгэгч нь "Хөвчийн зам" ХХК бол туслан гүйцэтгэгч нь "Багануур АЗЗА" ТӨХК аж. Харин багц-2-т 700 метр зам хамаарч гүйцэгтгэгч нь “Тэгш плант” ХХК. 1,2 км замыг хэдэн төгрөгөөр барьж байгуулсаныг www.tender.gov.mn сайтаас авсан мэдээллээрээ яг таг оруулъя. 1-р хэсгийн 500 метрийг “Хөвчийн зам” ХХК 798,288,519 төгрөгөөр, 2-р хэсгийн 700 метрийг “Тэгш палант” ХХК 627,997,958 төгрөгөөр тус тус барьсан байна. Нийт өртөг нь 1,426,286,477 төгрөг гэсэн үг. Бараг 1,5 тэрбум төгрөг. "Хөвчийн зам", "Тэгш плант" ХХК-иудын тухай мэдээллийг хүссэн хүн бүхэн гүүглээс хайгаад олоод үзчихэж болно. "Хөвчийн зам" ХХК нь барьцаалан зээлдүүлэх үйл ажиллагаа явуулахаар 2017 онд байгуулагдаж түүнээсээ хойш төрийн 28 тендэрт оролцож 5 тендерт ялж, 6 тендер одоогоор нээгдээгүй, 17 тендерээс хасагдаж. Шалгарсан тендрийн ажлын нэг нь дээрх замын нэгдүгээр хэсэг болох 500 метр. Тус компанийн шалгарсан тендэрийн хамгийн өндөр дүнтэй нь Хэнтийн аймгийн Өмнөдэлгэр сумын сумын төв доторх хатуу хучилттай зам 2,5 тэрбум бол Мөрөн сумын сумын төв доторх хатуу хучилттай замын тендэр 1,9 тэрбум. "Тэгш плант" ХХК нь авто зам, хатуу хучилттай зам барих, засварлах, асфальто бетон үйлдвэрлэх чиглэлээр 2014 онд байгуулагджээ. Төрийн 23 тендерт оролцож 4 тендерт шалгарч. Үүний нэг нь хэл ам татлаад буй замын хоёр дахь хэсэг буюу 700 метр нь.

Багануур дүүргийн тавдугаар хороо ЖДҮДТ-ийн уулзвараас гуравдугаар хороо “Шунхлай” ШТС хүртэлх 1,2 км замын ажил 2019 оны 10 дугаар сарын 30-аас эхэлсэн. Багануур дүүргийн 40 жилийн ойн баяр наадмын үеэр нээх гэсэн ч ажил амжаагүй юу, асуудал гарсан уу ямартаа тууз хайчилж чадаагүй. Багануур дүүргийн ЗДТГ-ын албан ёсны фэйсбүүк хаягнаас нэгдүгээр хэсэг бэлэн болсон, хоёр дахь хэсэг удахгүй бэлэн болно гэх утгатай мэдээлэл наймдугаар сарын дунд нийтлэгдэж байв.

Ингээд замын хөдөлгөөнийн наймдугаар сарын 26-нд албан ёсоор нээлээ. Багануурт төдийгүй улс даяар хур бороо элбэгтэй байгаа нь чанаргүй бүтээн байгуулалтуудын тарыг таниулж буй. Улаанбаатар хотод авто зам нь урсаж байхыг бид зурагтаар харж гайхширч байсан бол Багануурт ашиглалтад ороод арав хоноогүй зам нь эвдэрч гэмтэн, хагарч цуурч иргэдийн бухимдлыг төрүүлэн сошиалд “шуугиан тарив”. Энэ бүхний дундуур тэс хөндлөн мэдэгдэл орж ирсэн нь Багануур АЗЗА-гийнх байв. Компанийн албан ёсны фэйсбүүк хаягаас эхлээд ажилтан албан хаагчид нь “Манайх ямар ч хамаагүй шүү” гэж ирээд л “биеэ өмөөрцгөөв”. Зам арчилалт хариуцдаг компанийнхан ингэж “уулгалан” орж ирсний учир нь тухайн компани туслан гүйцэтгэгчээр ажилласных байв. Төрийн өмчтэй Багануур АЗЗА компанийхан “Авто замын ажлыг зураг төсөл болон технологийн шаардлагын дагуу хийж гүйцэтгэсэн бөгөөд гэрээнд заасан хугацаанд хатуу хучилттай иж бүрэн, авто замыг 2019 оны 10 дугаар сарын 30-наас эхлэн 2020 оны 07 дугаар сарын 17-нд гүйцэтгэн авто замын ажил бүрэн дуусч улсын комисст хүлээлгэж өгсөн. Манай компанийн хийсэн Багц-1 буюу МТ ШТС-ээс эхлэх 0,5 км хатуу авто замд эвдрэл гэмтэл үүсээгүй болно” гэсний дээр байгууллагын ажилчид манай 500 метрт биш 700 дахь метрт л байгаа хэмээн мэдэгдэв. Би үхэхээр чи үх гэх дүр зураг л харагдана...

Эцэст нь төсвийн 1,5 тэрбум төгрөгөөр 1,2-хон км замыг хийхдээ сэтгэл гаргаж чанартай хийгээгүй компанид, төрийн нэрийн өмнөөс хяналт тавих учиртай албан хаагчдад, том бүтээн байгуулалт, төв замын ачааллыг бууруулна хэмээн баатрын дүр үзүүлж байсан ч хэл ам татлаад эхлэхээр таг дуугүй болчихдог дарга нарт “гомдож” байна. Удахгүй бид тодорхой бичлэг хийн, албаны хүмүүсээс тодруулга аван та бүхэндээ хүргэх болноо...