"Багануур ньюс" сонины архиваас. 2015 оны долоодугаар сарын 06. №21

2013 онд гэр хорооллын гудамжинд иж бүрэн тоглоомын талбайг “Баз Асар”, “Классик тохижилт”, “Цахирт Ану” ХХК-иуд Орон нутгийн хөгжлийн сангийн хөрөнгө оруулалтаар байгуулсан. Эдгээр тоглоомын талбайнуудыг байгуулахад зарцуулсан мөнгө тийм ч бага биш. Тавдугаар хорооны Байдлаг хэсэгт байгуулсан тоглоом 49,901,600 төгрөгийн өртөгтэй. Харин одоо энэ тоглоомын талбай өнөөдөр хашаагүй болсны дээр нэлээд олон тоглоом эвдэрч хэмхэрчээ. “Чанаргүй болохоор л эвдрээ биз” хэмээн иргэн та бухимдаж магад. Харин тоглоомын талбай дээгүүр хөглөрөх архи, пивоны шил, хүүхдүүдээ тоглуулж байгаа аав ээжүүдийн яриа “Үгүй” гэсэн хариултыг өгч байна. Тоглоомын талбайн нэлээд хэсэгт зөөлөвчтэй хавтан дэвсэж бага насны хүүхдийг бэртэж гэмтэхээс сэргийлсэн ч өнөөдөр хулаад аваад  явчихаж болох хэсгүүд нь “нүцгэрчээ”. Хатуу цемент дээр хүүхдүүд хамраа халцлах шахам гулгаж байна. Зөөлөн хавтан хаачсаныг сураглахад “Өвөл хүмүүс зөөгөөд дуусгасан” гэх. Манай энд л тоглоом хэрэгтэй гээд байсан иргэд талбайг “нүцгэлж” байхад яагаад нүдэн балай, чихэн дүлий байв. Хүүхдийн тоглоомын талбай дээр архи ууж, эвдэж хэмхэлж байгаа томчуудад шаардлага тавиад хоёрхон үг хэлчихэж чадахгүй болохоор л бид хэтэрхий байна уу даа гэх бодол өөрийн эрхгүй төрөөд байгаа юм. Нийтлэлийн эхэнд яагаад алтан загасны үлгэрийн талаар дурдсаныг одоо хэлье. Бас буцаад яв байшин гуйгаад ир гэх мөртлөө өөд нь татаад өнгөлөөд явахгүй дахин дахин нэхдэг шүү дээ. Бид яг л ийм төрхтэй байна шүү дээ иргэдээ. 2013 онд эдгээр тоглоомуудыг орон нутгийн хөгжлийн сангийн хөрөнгөөр хийсэн тухай дурдсан. Орон нутгийн хөгжлийн сангийн хөрөнгийг хэрхэн юунд зарцуулах талаар иргэдээсээ асуудаг. Асуусныхаа дагуу төлөвлөдөг. Тоглоомтой болмоор байна гэсэн хүсэлтээр зөвхөн нэг байршилд 50 шахам сая төгрөгөөр тоглоомын талбай байгууллаа. Өнгөлөөд өөд нь татаж чадахгүй юмаа гэхэд хогоо хогийн саванд нь хийчихвэл... Бид тоглоомтой болчихвол хүүхэд багачууд маань тоглоод энэ хавь сайхан болно гэж ярьж байснаа саная. Хоёр зуныг үдэхэд тал нь үлдсэн тоглоомын талбай хэзээ дуусах нь ойлгомжтой. Хүүхдийн дуу цангинан жаргалтай инээж байсан энэ талбай удахгүй хүүхдэд ээлгүй, бохир, аюултай газар болон хувирч магадгүй л харагдана. Уусан архинынхаа шилийг энд хагалаад орхиход чинь хүүхэд хөлөө гэмтээнэ, уураа гаргаад хугалчихсан тоглоомонд чинь нэг хүүхэд бэртэнэ... Хайр гамгүй хандаж хамаг тоглоомыг нь эвдчихээд дахиад тоглоомын талбай тохилог орчныг нэхэх үү? Алтан загасны эмгэн шиг зангаасаа салж, арчаатай, хариуцлагатай, бие биедээ хяналт тавьдаг болъё. Тэгвэл бид “нэхэн байж хийлгэсэн” ажлынхаа үр дүнгээр алхам алхамаар амьдрах орчноо сайжруулж чадна. Хүүхдүүд маань аюулгүй орчинд тааваараа тоглох учиртай. Харин тэр эрхийг нь та бид томчууд нь хамгаалах ёстой. Харин хамгаалж өмгөөлж, хадгалж чадаж байна уу? Энэ асуултын хариуг иргэн та өөрөөсөө нэг хайгаад үзээрэй. Хүүхдийн гэх орчныг цэврээр нь хадгалж үлдэхэд томчууд бидний оролцоо их...